صغيره وماتعرف تحب.. ولا دغـدغ قلبها الشــــوق
هظيمة بشط هواها الروح .. ودومها معاتت اويه الموج
صغـــــــيره وحســـــرتي كبــــــيره ..
يا صاحبي ما أظنها تفّل ..ولا اظن يحصد اليشتل
تصــد مــرّه وأعاتبــها .. تراضيني وترد تجفــــل
لا غلطه البدت مني .. ولا كلمه الكلت عنها ولا عني
أهيم وما أكول أرجع .. تجي يمّي وتحابسـني
أنام وحتى ساعه أهجع .. تجي بطيفي وتفززني
وأحس بحركة بضلوعي .. وتضل تدي وحنيني يصب
وأكول هذي هم قسمه ..صغيرة وما تعرف تحب
كثيره أيام يا ناس مرت وآنا هالحاير .. لا شوره التدليني ولا شاير
واشوف الناس كلها عـزاز .. وآنـــــــا وحيـــدهم بايــــــر
اشـــجاني واشحصلت منـــــها ؟
عواذل وشت عليّ .. مثل ما وشـــت عليها ؟
لا مامش عواذل .. العواذل ما تحاجيـــها !!
عرفته اللي كــان واشـــيها .. !!!
ولك يا صويحبي استاذي يحـوم ويـدور عليها
تحاجيه ويحاجيها .. تناغيــه وينــاغيها
أقول يا صاحبي اسندني .. أشوف الدنيا إتل بيه وأتل بيها
اكله استادنا ريّض .. يقــــول هاي النـاس شعليها
حســــافة اســـتاد .. جنك ما دريت بحسبتي وياها
حســــافه اســــتاد .. قلبي اللي هواها شلون ينساها
شـــكول عليك يا استاذي .. شــريد أدعي ؟
عسنك بيش
بالحسرة التحز بكَليبي وبضلعي
بالعبره التسيّل عالوجن دمعي
بالضحكات بالجلمات علمعبر
نار وبالضلع تسعر
عسى انك بيش يملذون يلن كل جلمة بالدفتر تذكرني هواها اكثر
واذكرنها احبنها
وحك عيناك يا استادي وعلي الشرجي احبنها
انخي عليك أبو حزامين لا توصل بعـــد يمها
شـــتريد انطيـــك شـــهديلك ..؟
الك قلبي وقــلبي عوسج ابهمها
الك روحي وانت الروح ظالمها
تريض وانعل الشيطان .. واسمع نخوة افادي
لو هذا الحجيته وياك ما ينحاج يا استادي
خل يشهد علي الهــادي
احرم عليك حتى طبة النادي
وشحدها وتكَلك طبصغيرة وما تعرف تحب
اشوف الناس كلها الناس تركض عل السراب تكول هذا المي وما مش ماي
وانا عليمن اكَنطر داي فوكَ الداي
ولفي وما يهمه بجاي
لجن انا يا بعد جلاي موش استاذ
ولا بيدي امر ذيج وهاي
وما اكَدر انجحنها لو سـاعه اضحكت ويــاي
ولا أقدر اسقطنها إن صــدت تـريد جفـــــاي
انا منين أجيب الشهادة منين وارضي بيها هواي
وأنا حسره عليّ يا استادي شربة الجاي
بس عندي كليب يا محلاه .. ألف حسره تحس بجلاه
وعندي تركة من بقايا الروح كثيره جروح وتصيح الدّاد
الخطية برقبتك يا استاد
جرحي ما يلفه ضماد .. ولا اظن قصتي على البشر تنعاد
هذي قسمتي من الله مو من واحد واعتب ..
صغيرة وما تعرف تحب
رد الاستاذ:
عيش ابخت واحجي ابخت وبوكَ ابخت مكَرود يالمالك بخت,
تركض وتتعب علولف تاليها تكعد على التخت
صدكَ يالتنشد عليها ودمع عينك حرام يصب
صدكَ يا فلان زعطوطةصغيرة وما تعرف تحب
صغيرة ولعبت عليةصغيرة وعذبت كَلبي
شفتها ابدرسي مو راحة تصد عين وترد تربي
تشيل اصبعها بالعمدا .. شحلات اصبعها يسبيني
واحس بدمها اليدبي واجاوبها وترد تسال
واشوف منادس الحلوات ياذيني
واحاجيها واكَول لكَيت مكَصودي
شحلاة الرد تكد ايدي وتسليني شسولفلك
اخاف تطول سالفتي
على ساعة لني غركَان ابعواطفها
احبج كالت حبيب اريدج كالت اتدلل
احب ذبة سوالفها اكلها شلون وانه استاد
اكلهة شلون اطب للصف اخاف حجاية العذال لو واحد يخالفها
يا عيب العيب كالت غصبا على الناس
احبك واعبد الدفتر اريدك واعشك الجلمة التوالفها
مشيت برجل تستاهل الجنة اثاريها بكبرها تطب
صدك يالتنشد عليها ودمع عينك عليها يصب
صدك يا فلان زعطوطة،صغيرة وماتعرف تحب
عليمن تنخه ابو حزامين وتتهد بعلي الشرجي وعلي الهادي
وتريد تحرمني غصب من طبة النادي
يا حيف عليك وانت مشورب وراهي
ويكولون الفهم عندك
ولك وين الفهم باليفرض بروحه على محبوبه ؟؟
الفهم يا فلان من يعرف معاني الحب على دروبه
العشكَ يا فلان روحين وسط الكلب مصلوبة
العشكَ رد وبدل يا فلان
لو بالكَوه جان صار العشكَ طوبه ..
اعاتب .. والعتب ياذيني ويذبني
اعاتب لجل عينك مو لجل وحدة تعذبني
تره انه هم مثلك ظليت مدوهن وحاير
انه الظليت ارد للضيم جبحاته
انه الظليت ذاك الكَال
لا ردنه ابو عليوي ولا بينت مسحاتة
رد الطالبة
جبيرة انه جبيرة وعدكم صغيرة
صغير الماعرف امره وتدابيره
صغير الوكَع حظه وبكَه بحيرة
ولك والحبوا يكولون ؟
لو مال الغصن حدرة يا طير اطفر الغيرة
جبيرة انه جبيرة وعدكم صغيرة
صغير انت .. صغيرة وما تعرف تحب
نسيت شلون جنت اتلكَاك من تجهب
هنايا لاهي وماعرفت اشلون تلهى
هنايا يساهي وما حسبت حسابك الها
ساعة اللكَيك يم سوسن
ساعة اللكيك يم زهرة
تعال اكرب اعتبنك ولو مره
تعال اكرب تعناني دشوفك جرحك اشكبره
تعال وصير عطابة
تعال وجم تعال وما نفع وياك وانت على ضحجات العليلة
شلون مسترطب
هذا انت وتكلي صغيرة وما تعرف تحب
شنهو الحب ؟؟
شتريد تكول .. شتوصفه ؟
المخلص يجيب الماي من الغيم لو لحظة عطش ولفه
لا تطري دروب الحب عليك محرمة كلفه
ادري بك طري ذبلان ادري بيك شبه سعفة
تميل وية الهوى لو مال
ماريدك بعد حيال ظل اسمع حجي العذال
واشبع لوم كلمن كال
المايعرف تدابيره حنطتة تاكل شعيره
جبيرة انا جبيرة وعدكم صغيرة
هذي قصتي وية فلان .. لاجن دشوف اشجان
استادي يصول يجول يدور ابحومة الميدان
يعض اصبع يظل سهران .. عليمن ؟؟
شنهو البدر مني وبان
يا ناس اسمعوا قصتي
شلت ايدي لجل فهم الدرس مو لجل حرشة غايتي
وجيتك مرة لو مرتين للغرفة
مرة توصفلي طريج الحل
مرة مدري اشجانت الوصفة
يا عيب العيب تحسبها سوالف شوكَ ولهفه
خلف الله على الدلاك عايزها بعد زفة
حرت انه يا هل وادم بين استادي والطالب
من مثلي على الصوبين دتحارب
بعت انه وشريت النوم ولا وفد يوم
اريد الناس ينسوني
اريدن تغمض جفوني
حيرانه الدرب دلوني
لا يوم اليمر يومي مو راح اشكَن هدومي
يا ربي شلون هلحيرة
جبيرة انه جبيرة وعدكم صغيرة
الرئيسية 
أحدث الصور 
التسجيل 
دخول 
